سەرۆكی هەرێمی كوردستان پێشوازی لە میری ئێزیدیان و بابێ شێخ و ئەندامانی ئەنجوومەنی ڕووحانیی ئێزیدی دەكات


KRP.org | |


17/03/2017
ڕۆژی هەینی 17ـی 3ـی 2017 بەڕێز مەسعود بارزانی سەرۆكی هەرێمی كوردستان پێشوازی لە میر تەحسین میری ئێزیدییەكان و بابێ شێخ و ئەندامانی ئەنجوومەنی ڕووحانیی ئێزیدی كرد و لە دیدارەكەدا باس لە بارودۆخ و گرفت و كێشەكانی دەڤەری شنگال و هەروەها دواڕۆژی ئێزیدییەكان كرا.

لەدوای ئەم دیدارەدا سەرۆك بارزانی بە ئامادەبوونی میرتەحسین میری ئێزیدیان و بابێ شێخ و ئەندامانی ئەنجوومەنی ڕووحانیی ئێزیدی لە كۆبوونەوەیەكی بەرفراواندا لەگەڵ ژمارەیەكی بەرچاو لە كەسایەتیی سیاسی و كۆمەڵایەتی و ئایینی و ڕۆشنبیری و ئیداری و سەربازیی ئێزیدییەكانی شنگال و ناوچەكانی دیكەی كوردستان كۆبۆوە.

لە دیدارەكەدا سەرۆك بارزانی ڕۆشنایی خستەسەر ئەو كارەسات و نەهامەتییەی بەسەر گەلی كوردستاندا هاتووە و كارەساتی شنگالیشی بە ئەڵقەیەك لە زنجیرەی ئەو كارەساتانە لە قەڵەمدا كە دوژمن لەدژی گەلی كوردستان ئەنجامی داوە. ئەوەیشی خستەڕوو كە ئێزیدییەكان بە درێژایی مێژوو تووشی زوڵم و ئینكار هاتوونە و ئەو زوڵمەیش بەهۆی پێناسەی ئایینی و نەتەوەیی ئێزیدییەكان بووە. ئەوەیشی دووپاتكردەوە كە عیبادەت و دینداریی ئێزیدییەكان بە زمانی كوردییە و ئێزیدییەكان كوردی ڕەسەنن و هیچ كەس و لایەنێكیش بۆی نییە هیچ پێناسەیەك بەسەر ئێزیدییەكاندا بسەپێنێت.

سەرۆك بارزانی ئێش و ئازاری ئێزیدییەكانی بە ئێش و ئازاری هەموو گەلی كوردستان زانی، هەربۆیەش پێشمەرگە بۆ ئازادكردنی چیای شنگال و شنگال و ڕێگاكانی سەدان شەهیدی بەخشی. سەرۆك بارزانی هێمایشی بەوەدا كە پێشمەرگە قارەمانانە تۆڵەی لە تیرۆریستانی داعش كردەوە و ئێستا تیرۆریستانی زاڵم كەوتوونەتە ژێر پێی ئێزییدییەكان و لە ئاییندەدا هەموو ئەو ناوچە و گوندانەی لەژێر دەستی داعش ماون ئازاد دەكرێن و پێویستیشە ڕێوشوێنی وا بگیرێتەبەر كە چیتر كارەسات لەدژی ئێزیدییەكان دووبارە نەبێتەوە و بپارێزرێن.

لەدرێژەی وتەكەیدا سەرۆك بارزانی ڕۆشنایی خستەسەر ئاوەدانكردنەوەی شنگال و گەڕاندنەوەی خەڵك و بە پارێزگاكردنی شنگال و ئاماژەی بەوەدا كە هەموو هەوڵەكانی خستووەتەڕوو كە لەڕێگەی حكوومەتی هەرێم و بەغدا و كۆمەڵگەی نێودەوڵەتی كار بۆ ئاوەدانكردنەوە و گەڕاندنەوەی ژیان و بووژانەوە بۆدەڤەری شنگال بكرێت و خەڵكی ناوچەكە بتوانن پشت بە خۆیان ببەستن.

سەبارەت بە بوونی هێزی تر لەم دەڤەرە سەرۆك بارزانی ئەوەی خستەڕوو كە هەتا دامودەزگەی ڕەسمیی هەرێم و هێزی پێشمەرگە لە دەڤەری شنگالدا هەیە ناكرێ هێزی تر هەبێ كە ڕێگە لە ئاوەدانكردنەوە و چالاكییەكانی دامودەزگەی حكوومی و جموجۆڵی پێشمەرگە بگرێت. پەیوەست بەم باسەوە سەرۆك بارزانی بۆچوونی وڵاتان و كۆمەڵگەی نێودەوڵەتیشی لەبارەی ئاوەدانكردنەوەی شنگال شیكردەوە كە لەسەر ئەم بڕوایەن هەتا هێزی نایاسایی لەم دەڤەرەدا مابێ ئامادە نین یارمەتیی ئاوەدانكردنەوەی شنگال بدەن.

هەر لەم كۆبوونەوەیەدا ئامادەبووان سوپاسی خەمخۆری و هەوڵ و ماندووبوونی سەرۆك بارزانیان كرد لە بەجێگەیاندنی بەڵێنی ئازادكردنی شنگال و چیای شنگال و داوایشیان كرد هەروەكچۆن لە قۆناغی نووسینەوەی دەستووری عێراق و قۆناغەكانی تر و تێكشكاندنی تیرۆریستان سەرۆك بارزانی پشتیوانی ئێزییدییەكان بووە لە ئاییندەیشدا چاویان لەوەیە سەرۆك بارزانی پشتیوانیان بێت بۆ چارەسەركردنی كێشەكانیان و پاراستنیان لە پیلانی ناحەزان.
لە بەشێكی دیكەی كۆبوونەوەكەدا ژمارەیەك لە ئامادەبووان لەبارەی كێشەكانی دەڤەری شنگال و باشیك و ڕەوشی ئێزییدییەكان لە كوردستان و بەجینۆسایدناساندنی كارەساتی شنگال و ئازادكردنی ئەو ئێزیدیانەی هێشتا لەژێر دەستی داعشدان، تێبینی و پێشنیاری خۆیان ئاراستەی سەرۆك بارزانی كرد.

جێگەی ئاماژەپێكردنە لەبارەی ئاوەدانكردنەوەی شنگال و داواكاری و پێویستییەكانی خوشك و برا ئێزییدییەكان میری ئێزییدیان و بابێ شێخ و ئەنجوومەنی ڕووحانیی ئێزییدییەكان یادداشتنامەیەكیان ئاراستەی سەرۆك بارزانی كرد.




SOURCE:: KRP PAGE HIT:: 252  


iraq kurdistan
​بە بەشداریی سەرۆک بارزانی، لە شاری سلێمانی کەرنەڤاڵێکی گەورەی پشتگیریی لە ڕیفراندۆمی سەربەخۆیی بەڕێوەچوو
​بە ئامادەبوونی سەرۆک بارزانی، لە سۆران کەرنەڤاڵی پشتگیریی ڕیفراندۆمی سەربەخۆیی بەڕێوەچوو
سوپاسنامەیەک لە سەرۆکی هەرێمی کوردستانەوە
سەرۆک بارزانی لەگەڵ نوێنەرانی پێکهاتەکانی دەشتی نەینەوا کۆبۆوە
بە بەشداریی سەرۆک بارزانی، لە دهۆک کەرنەڤاڵی پشتگیریی لە سەربەخۆیی بەڕێوە چوو
پەیامی سەرۆكی هەرێمی كوردستان بۆ گردبوونەوەی پشتگیریی ڕەوەندی كوردستانی لە ڕیفراندۆم لە وڵاتی سوید
سەرۆک بارزانی بەشداریی لە کەرنەڤاڵی جەماوەری ئامێدی بۆ پشتگیریی لە ریفراندۆمی سەربەخۆیی کرد
سەرۆک بارزانی بەشداریی لە کەرنەڤاڵی جەماوەری زاخۆ بۆ پشتگیریی لە ریفراندۆمی سەربەخۆیی کرد
بە بەشداریی سەرۆک بارزانی، لە ئاکرێ ئاهەنگێکی جەماوەری بۆ پشتگیریی لە ریفراندۆمی سەربەخۆیی بەڕێوەچوو
سەرۆکی هەرێمی کوردستان لەگەڵ نوێنەرانی پێکهاتەکانی کەرکووک کۆبۆوە