سەرۆكی هەرێمی كوردستان بەشداریی لە مەراسیمی ساڵیادی كارەساتی شنگال لە شاری دهۆك دەكات


KRP.org | |


03/08/2016
ڕۆژی چوارشەممە 3ـی 8ـی 2016 بەڕێز مەسعود بارزانی سەرۆكی هەرێمی كوردستان بەشداری مەراسیمی ساڵیادی كارەساتی شنگال لە شاری دهۆك كرد.

لە مەراسیمەكەدا كە ژمارەیەكی زۆر لە هاووڵاتیان و كەسوكاری قوربانیانی كارەساتی شنگال و كەسایەتی و پیاوانی ئایینی ئێزیدی و مەسیحی و ئیسلام و نوێنەر و كونسوڵی وڵاتانی بیانی و ڕێكخراوەكانی كۆمەڵگەی مەدەنی و كەسایەتییە سیاسی و حزبی و ئیدارییەكانی هەرێمی كوردستان ئامادە بوون، سەرەتا سەرۆك بارزانی پێشانگایەكی فۆتۆگرافی لە شوێنی مەراسیمەكە بەسەر كردەوە كە تایبەت بوو بە وێنەی ئەو كارەسات و ئازارانەی كە لە ئەنجامی پەلاماری دڕندانەی تیرۆریستانی داعش بەسەر ئێزیدییەكاندا هاتووە.

هەر لەو مەراسیمەدا سەرۆك بارزانی وتەیەكی بۆ ئامادەبووان پێشكەش كرد و وێڕای بەخێرهێنانی میوان و ئامادەبووان باسی لە كارەساتی شنگال كرد و ڕايگه‌ياند، دوو ساڵ به‌ر له‌ ئێستا كاره‌ساتێكى مه‌زن به‌سه‌ر گه‌لى كورددا له‌ شنگالدا هات. ئه‌مه‌ يه‌كه‌م كاره‌سات نه‌بووه‌ و به‌ هيواى ئه‌وه‌ى دوايين كاره‌سات بێت و ئەو كارەساتە درێژەی ئەو زنجیرە كارەساتانەیە كە بەسەر گەلی كوردستاندا هاتووە، هەر لە وێرانكردنی چوارهەزارو پێنجسەد گوند بگرە هەتا بێسەروشوێنكردنی دوازدەهەزار گەنجی فەیلی و هەشتهەزار بارزانی و سەدوهەشتاودوهەزار ئەنفالی گەرمیان و كیمیابارانكردنی هەڵەبجە. سه‌باره‌ت به‌ تاوانه‌كانى داعش، سەرۆك بارزانی گوتى: ئه‌وه‌ى تيرۆريستيانى داعش ده‌يكه‌ن له‌ هيچ ياسا و ئاينێكدا جێى نابێته‌وه‌ و ئه‌وان هیچ ئایین و ناموسێكيان نييه‌ و گه‌لى ئێمه‌ بە ڕەوشتی بەرزی خۆی سه‌لماندى كه‌ گه‌لێكى ئاينداره و پێشمەرگە مەردانە تۆڵەی لە داعش كردەوە‌. هەروەها ڕایگەیاند ئه‌وه‌ى به‌سه‌ر ئێزدييه‌كاندا هاتووه‌ به‌سه‌ر هه‌مووماندا هاتووه‌ و كچى ئێزدى نامووسى هه‌موو كورده‌ و ئه‌و رۆژه‌ى بابه‌شێخى ئێزدييان هات و گوتى: ئه‌و پێى وتم كه‌ئه‌و ئێزدخانه‌ له‌ناو چووه‌، منيش پێم گوت: تا كورد مابێت ئيزدخان له‌ناوناچێت و به‌ڵێنم پێدا كه‌ تۆڵه‌ى ئه‌و كاره‌ساته‌ ده‌كه‌ينه‌وه‌، به‌ڵام تۆڵه‌كردنێكى كوردانه‌.

سەرۆك بارزانی لەبارەی قوربانیدانی پێشمەرگە ئەوەی خستەڕوو كە هەتا رێگه‌ى شنگال رزگار كرا 500 شه‌هيدمان داوه‌. ئەوەیشی پێشنیار كرد، شارى شنگال وه‌ك ئه‌وه‌ى ئێستا هه‌يه‌ بمێنێته‌وه وەك هێمایەك بۆ نەهامەتییەكانی گەلی كورد‌ و له‌ نزيك شنگال شارێكى ديكه‌ درووستبكرێت. سه‌باره‌ت به‌وانه‌ى هاوكارى داعشيان كردووه‌، سه‌رۆك بارزانی گوتى: هه‌موو ئه‌وانه‌ى هاوكارى داعشيان كردووه‌، ده‌بێت به‌ سزاى خۆيان بگه‌يه‌ندرێن و ئه‌وانه‌ى رۆژێك هاوكارى داعش بوونه‌ دوژمنى ئێمه‌ن و ئه‌وه‌ى دژى داعشه‌ دۆست و هاوڕێمانه‌.

له‌ كۆتايى وتاره‌كه‌شيدا، سه‌رۆكى هه‌رێمى كوردستان باسى له‌ رزگاركردنى موسڵ كرد و گوتى: رزگاركردنى موسڵ بۆ هه‌رێمى كوردستان زۆر گرنگه‌ و وه‌ك چۆن به‌ڵێنم به‌ ئێزدييه‌كان دا شنگال رزگار ده‌كه‌ين، ئێستاش به‌ هه‌مان شێوه‌ به‌ڵێن به‌ هاووڵاتيانى مه‌سيحى ده‌شتى نه‌ينه‌وا ده‌ده‌م، كه‌ ناوچه‌كانيان رزگار ده‌كه‌ين و ده‌چنه‌وه‌ سه‌ر ماڵ و حاڵى خۆيان.



سه‌باره‌ت به‌ چاره‌نووسى هه‌رێمى هه‌رێمى كوردستانه‌وه‌، سه‌رۆك بارزانی رايگه‌ياند، پێويسته‌ ئێمه‌ بڕيارى خۆمان بده‌ين، يان ئه‌وه‌تا رازى بين خه‌ڵكى ديكه‌ له‌ باره‌ى ئێمه‌وه‌ بڕيار بدات و ئه‌و كاته‌ش گله‌يمان نه‌بێت يان ده‌بێت موجازه‌فه‌ بكه‌ين و خۆمان بڕيارى خۆمان بده‌ين و ئاماده‌ى ئه‌و موجازه‌فه‌يه‌ بين و سه‌ربه‌خۆيى ته‌نيا رێگه‌يه‌ بۆ دووباره‌ نه‌بوونه‌وه‌ى ئه‌و كاره‌ساتانه‌ و جگه‌ له‌سه‌ربه‌خۆيى هيچ رێگايه‌كى ديكه‌مان له‌به‌رده‌مدا نييه‌.

بۆ بینینی وتاری سەرۆك بارزانی ئێرە دابگرە

ب ناڤێ خودێ مەزن و دلۆڤان

خوشك و برایێت بەركەفتی

ئامادەبوێن بەڕێز

میوانانی بەڕێز

بەخێرهاتن و سوپاسی ئێوە دەكەم بۆ ئەوەی ئەو دەرفەتەتان بۆ ئێمە رەخساند كە بەشدار بین لەو رۆژەدا ، كە رۆژی بیرەوەریەكی زۆر دڵتەزێنە. بەڵێ بەری دووساڵ لە رۆژێكی وەكو ئەمڕۆ كارەساتێكی مەزن بە دەستی گەلی ئێمە هات بەدەستی تیرۆریستانی داعش .بەڵێ ئەمە كارەساتی یەكەم نیە بەڵام هێڤیدارین ببێتە دوایین كارەسات كە بەسەر گەلی كورددا هاتبێ.

ئەگەر بۆ دیرۆك بگەڕێینەوە دەبینین، ئەمە خەلەكەیەكە لە زنجیرەیەك كارەساتی یەك لە دوای یەك، من ناگەڕێمەوە دیرۆكی زۆر دوور، بەڵكو بۆ 30 -40 ساڵ بەری نها، 4500 گوندێ مە هاتیە وێران كردن، 182 هەزار كەس كە زۆربەیان ژن و زارۆك بوون لە هەڵمەتەكانی ئەنفال بێ سەر و شوێن كران ، 12 هەزار خورتێت فەیلی لە تەمەنی 18 – 30 ساڵ بێ سەر و شوێن كران، 8 هەزار بارزانی لە تەمەنی 10 – 90 ساڵ بێ سەر و شوێن كران، سەرتاسەری كوردستان كیمیاباران كرا و لە هەڵەبجە لە ماوەی دوو سێ خولەكدا 5 هەزار كەس كە 80% یان ژن و زارۆك بوون بە ژەهری كیمیایی شەهید كران. ئەمەش درێژە پێدانە بۆ ئەم كارەساتانە.

ئەوان تەنها بۆ ئەوە نەهاتبوون ئەو تاوانانەی لە شنگار ئەنجامیان دا تەنها لەوێ بیكەن، بەڵكو ئەوان بۆ ئەوە هاتبوون ئەوەی لە شنگار ئەنجامیان دا لە سەرتاسەری كوردستان ئەنجامی بدەن و كوردستان داگیر بكەن بەڵام سوپاس بۆ خوا و سوپاس بۆ پێشمەرگەی قارەمان كە زوو پێیان راگەیشتن و بەر سینگی ئەوانیان گرت و ئەفسانەی ئەوانیان شكاند.

لە هەموو یاساكانی دونیا، لە هەموو یاساكانی دونیا لە كاتی شەڕدا مافی خەڵكی سڤیڵ و ژن و منداڵ پێویستە پارێزراو بێت، لە شەڕیش سەركەوتن هەیە و شكستیش هەیە بەڵام یاساش هەیە پێویستە ڕەچاو بكرێت بەڵام ئەوەی تیرۆریستانی داعش ئەنجامیان دا لە هیچ یاسا و دین و مەزهەبێكدا نیە بۆیە هەر چی سیفەتێك بۆ ئەوان بگوترێت هێشتا هەر كێمە چونكە ئەوان دڕندە و كافر و بێ دینن.

ئەوان بێ دینی خۆیان سەلماند و میللەتی ئێمە دینداری خۆیان سەلماند، ئەوان بێ نامووسی خۆیان سەلماند و میللەتی ئێمە نامووسداری خۆی سەلماند . كاتێك ئەو شكستە بەسەر میللەتی ئێمە هات، ئێمە پڕمان نەدایە نامووسی كەس ، ئەوە بوو جیاوازی ئێمە و ئەوان كە ئەوان نە دینیان هەیە و نە نامووس بەڵام میللەتی ئێمە میللەتێكی دیندار و نامووس دارە.

جارێكی دیكەش دەیڵێم ئەوەی بەسەری خوشك و برایانی ئێزیدی هات بەسەر ئێمەش هات،ئەو كارەساتە هی هەمووانە، و جارێكی دیكەش هەمان ئەو قسەیەی لە رۆژی ئازادكردنی شنگار دا گوتم دووبارەی دەكەمەوە، كچكا ئێزیدی بو مە هیما شەرەفێیە و ئەمڕۆ نامووس و شەرەفێ گەلی كوردستان لە كچكا ئێزیدی را دبینین بۆیە دووپاتی دەكەمەوە پێویستە كچكا ئێزیدی سەربڵند بیت و بلا بێژیت ئەز كچم كچا كوردانم گولیكا سەری پێشمەرگانم.

سوپاس بۆ خوا تا نها زیاتر لە 2500 كە كەوتبوونە دەستی داعش لە ژن و زارۆك و زەلام رزگار كراون، پەنا بە خوا ئەوانی دیكەش دێنە ئازادكردن و ئەوانەشی بە دەستی ئەوان هاتنە تەلەفاندن بێگومان شەهیدن، ئەز چەوا من لێرە بەڵێنم دا كە شنگاری بۆ وان ناهێڵین و شنگار رزگار دەكەین، جارێكی دیكە بەڵێن دەدەم : یەك بست لە ئاخی كوردستان لە ژێر دەستی داعش دا ناهێڵین.

خوشك و برایێت بەڕێز ...

كارەسات كارەساتەكا زۆرا مەزن بوو، پشتی كو كارەسات روویدا بە دوو سێ رۆژ، هیچ كاتێك لە یادی ناكەم كاتێك جەنابی بابە شێخ و چەند ریش سپیەكی ئێزیدیان هاتنە لام، بەڕاستی رۆژەكا نە خۆش بوو و چ جارا روندكێ بابە شێخ لە بیر ناكەم، ئەو كات بابە شێخ گوتیە من ئێزدخانە تەواو بوو، من گوتم نەخێر، ئەو بیرە مەكەن ئەو كاتەی ئێزدخان تەواو ببێت كوردستان تەواو دەبێت.

هەروەها پێشم گوت : باوەڕ بكە دلێ من خوێنی لێ دێ و ڕەنگە بێژمە تە لە ئێوە زیاتر موتەئەسیرم بەڵام بەڵێنت پێدەدەم یان دەبێ تۆڵەی خۆمان لەو تاوانبارانە بكەین،یانیش سەری خۆمانی لەسەر دادەنێین سوپاس بۆ خوا بە مەردایەتی تۆلە هاتە كرن . من باش لەئێوە و هەستی ئێوە تێدەگەم بەڵام دەبێ پەروەردە و كولتووری خۆمان بپارێزین، تۆڵە ئەوە نیە خورتێت مە و گەنجێت مە بە هەمان شێوە بچێ رەفتاریان لەگەڵ دا بكات، بەڵام ئەخلاقی میللەتی ئێمە وا بووە بە مەردایەتی تۆڵە بكەینەوە. میللەتی ئێمە میللەتێكی بە ئەخلاق و بە تەربیەتە، لەساڵی 1991 دا ئەو دوو فەیلەقەی كوردستانیان وێران دەكرد هەموویان كەوتنە دەستی جەماوەر و پێشمەرگە بەڵام یەك كەسیشیان ئەشكەنجە و ئەزیەت نەدرا و نەهاتە كوشتن و ئێمە ڕەوشتی بەرزی خۆمان نیشاندا . پشتی رزگاربوونی شنگاریش دیسان میللەتی ئێمە هەمان رەوشتی بەرزی خۆی نیشان دا . تۆڵە ئەوە نیە هەمان ئەو تاوانەی لە دژی تۆ ئەنجام دراوە لە دژی ئەوەی بەرامبەرت ئەنجامی بدەیت، تۆڵە ئەوەیە كە بكەونە ژێر پێی ئێوە و كەوتنە ژێر پێتان.

شەڕەكە ئەوكات تازە بوو تاكتیك تازە بوو، راستە ئەو چەند رۆژەی دوای كارەساتەكە زۆر ب سەخت و زەحمەت بوون بەڵام سوپای بۆ خوا پێشمەرگە زوو بەخۆ كەوتن و گەیشتن و ئەوەی ئەمڕۆ دەیبینین ئەمڕۆ سوپاس بۆ خوا پتر لە 28 -30 هەزار كیلۆمەتری چوارگۆشە رزگار كراون و هەندێك شوێنی دیكەش ماون پەنا بەخوا ئەوانیش رزگار دەكرێن.

رەنگە زۆر جار ئەو قسەیە كرابێت كە كەس نەما و هەموو شوێنەكان جێهێشتران، ئیدی شەڕە و زۆر شت روودەدات و چەندین هەڵوێست دێنە گۆڕین، بەڵام ئەو قارەمان و پێشمەرگانەی لە چیای شنگار مانەوە، لە رۆژانی تەنگ و ناخۆشدا بە شێوەیەكی قارەمانانە بەرگریان لە مەزاری شێخ شەرەفەددین كرد و نەیانهێشت تیرۆریستانی داعش بگەنە ئەوێ، ئەوانە كێ بوون؟ ئایا ئەو پێشمەرگە قارەمانانە نەبوون؟ جێی داخێكی زۆرە زۆر كەس هەوڵی ئەوەی دەدا بە شێوەیەكی زۆر نا بەجێ سوود لەو كارەساتە وەربگرێت كە كارەساتێكی نەتەوەیی بوو بەڵام زوو زوو پێشمەرگە وەڵامی هەمووانی دایەوە.

باشە ئەوانە لەكوێ بوون؟ تا پێشمەرگە نەهات و رێگەیان نەكردووە و شنگاریان رزگار نەكرد، بەو هەموو هێز و توانایەیان هەیانە لەبەرچی نەهاتن و شنگاریان رزگار نەكرد چاوەڕوانی چیان دەكرد؟

كاتێك من هاتمە ئەو ناوچەیە، تەخمیناتی زۆرم كرد، مومكینە لەو كاتەی رەبیعە ئازاد كرا پێشمەرگە پێشڕەوی بكردابوایە رەنگە بگەیشتبوایە شنگار، بەڵام ئێوە هەڵسەنگاندنی خۆتان بكەن، ئەگەر 70 كیلۆمەتر لە دوای خۆت ئەمین نەبی، رۆژێك یان دوو رەنگە بارودۆخ ئارام بێ بەڵام دواتر دەبێ رۆژانە پێشوازی لە جەنازەی رۆڵەی خۆت بكەیت، پێشوازی لە برینداری خۆت بكەیت، چۆن دەتوانی لەو 70 كیلۆمەترە خۆت بپارێزیت كە دەوروو بەرت هەموویان ناحەز و دوژمنن و تیایدا بڕۆیت؟ ئێمە ئەو چەك و توانایەمان نەبوو بۆ ئەم مەبەستە و هەڵسەنگاندنی خۆمان پێشكەش كرد و بەرپرسانی خۆمانم كۆكردەوە و پێیانم گوت : ئەوانە زوڵمی زۆریان لە ئێمە كرد و كردنەوەی رێگا بە تەنها كافی نیە و دەبێ شتێكی وا بكەین تا هەتایە شنگار ئارام بێت و پشتا شنگار یا ئەمین بی رێگەمان بۆ ئەوێ كراوە بێ.

ئێمە ئەو كارەمان بە دوو قۆناغ كرد، یەكەمیان لە زوممار و سەهریجەوە بۆ حەردان، و دواتر بەرەو رەبیعە رۆیشتین و یەكەمین رێگا كە كرایەوە رێگەی چیا بوو ، بۆ شنگاریش ئێمە بە نیاز بووین لەگەڵ ئۆپەراسیۆنی مووسڵ رزگاری بكەین و لەگەڵ رزگاركردنی مووسڵ لەیەك كاتدا ئەنجامی بدەین بەڵام ئەو كارە هەمیشە دوا دەخرا و تا ئەمڕۆش مووسڵ ئازاد نەكرا، بۆیە بڕیاری خۆمان دا شنگار رزگار بكەین و كەس وەكو ئێوەی خەڵكی شنگار نازانێ كی شنگاری رزگاركرد و چۆن رزگاركرا.

7 هەزار كیلۆمەتری چوار گۆشە لە پشتی شنگار هاتیە پاكسازی كردن، و لێرەدا دەمەوێ دووپات لەسەر پرسێكی گرنگ بكەم كە زۆر جاران دووپاتم لەسەری كردۆتەوە ئەوەی هاروكاری داعش كردبێت و چاوساغی بۆ داعش كردبێت، و بەهەر جۆرێك هاروكاری داعشی كردبێت، چارەنڤیسێ ئەوان وەكو داعش دەبێت و ئەوێت كو دەستی بۆ نامووسی گەلێ مە درێژ كردبێت دیسان والله تا یەك ژ وان مابێ و دەسەڵاتمان هەبێت ئێمە وازی لێ ناهێنین.

ئەوە واتای ئەوە نیە ئەم قسەیە لە دژی پێكهاتەیەكی دیاریكراوە، ئەو كورد و عەرەب و توركمانەی لەگەڵ داعش دابێت، هەر نەتەوە و هەر لایەنێك لەگەڵ داعش دابێت دوژمنی ئێمەیە و ئەوەی لەدژی داعش بێت برا و دۆست و هەڤاڵی مەیە.

بۆیە پێویستە ئەو رەوشت و فەرهەنگەی پێكەوەژیان هەیە بمێنێت وبپارێزرێت، چۆن لە ڕەوشت و مێرینی و خۆڕاگری نموونە بوون، پێویستە لە مەسەلەی پێكڤە ژیانیش نموونە بن، ئەوێ كو دگەل داعشی دا نەبێت برا و دۆستی ئێمەیە، ئەو عەرەبانەی لەگەڵ ئێمەدا دەژین برای ئێمەن و دەبێ رێزیان لێبگرین و رێزیشیان لێ دەگرین، ئەوەی لەگەڵ داعش رۆیشتن وەكو داعش مامەڵەیان لەگەڵدا دەكرێت.

بۆیە پێویستە ئەوان یەكێك لەم دوو رێگایە هەڵبژێرن، وبڕیاری خۆیان بدەن رێگەی داعش هەڵدەبژێرن یان رێگەی مرۆڤایەتی و میللەتێك دەكەن، بەڵام رەفتاری ئێمە و ئێوە پێویستە رەفتارێكی نموونەیی بێت. ئێمە تا رێگای شنگارمان كردەوە و شنگارمان رزگاركرد 500 شەهیدمان دا ، ئەو شەهیدانە بۆ ئەوە نەبوو یاری بە خوێنی ئەو شەهیدانە یانیش بە هەستی خەڵكی شنگارێ بكات.ئەو شەهیدانە بۆ ئەوە بوو ئێوە ئازاد بن و بڕیاری خۆ بدەن و بڕیار لەسەر چارەنووسی خۆتان بدەن وكەسی دیكەش لە شوێنی ئێوە بڕیار لە چارەنووسی ئێوە نادات.

لێرەدا بە پێویستی دەزانم سوپاسی هاوپەیمانان و هەموو ئەو دۆستانە بكەم كە لە رووی سەربازی و مرۆیی یارمەتی ئێمەیان دا وهیوادارین لەوەش زیاتر بێنە پێش و هاوكاری ئێمە بكەن و شنگار و دەورووبەری شنگار و ئەو ناوچەیە بە شێوەیەكی زۆر شارستانی و نوێ ئاوەدان بكەینەوە.

پێشنیاری ئەوەش دەكەم باژێری شنگار وەكو یادگاریەك بمێنێت بۆ نەوەكانی داهاتوو تا بزانن چی بەسەر میللەتی ئێمە دا هات لە ڕەخ شنگار باژێرەكی نوێ بێتە بونیاد نان و ئەم داوایە دەخەمە بەردەم حكوومەتی هەرێمی كوردستان كە بێگومانم لەوەی درێغی ناكات بۆ ئەوەی هەوڵی جدی بدەن و بەرنامەیەكی رێك و پێك دابندرێت بۆ ئەوەی ناوچەكە ئاوەدان بكرێت و ئاستی ژیانی خەڵكی ناوچەكە زیاتر بەرزتر ببێتەوە و ژیانەكا بەختەوەر و ب خۆشی ببەنە سەر.

بەری نوكە بەڕاستی شنگار گەمارۆ درابوو،وەكو دوورگەیەك بوو لەنێو دەریایەك ئەمڕۆ دەتوانم بڵێم شنگار بە تەواوی رزگار كراوە، چونكە ئێمە لە جیاتی یەك رێگا سێ رێگامان هەیە و پشتی شنگاریش ئەمین بووە و بە تەواوی پاك كراوە و جارێكی دیكە ناهێڵین كەس لە دواوە خەنجەری ژەهراویمان لێ بدات، ئەو ناوچەیە پێویستە پاكژ و ئارام بێت و شوێنی كەسی خائین و غەداری لێ نەبێتەوە.

ئەرك و كاری هەموو لایەكیش بەردەوامن بۆ ناساندنی ئەم كارەساتە وەكو جینۆساید و هەوڵی بەردەوام دراوە و دەدرێت بۆ ئەم مەبەستە و پەنا بەخوا دەگەینە ئەنجام.

لەو بۆنەیەدا پێویستە ئاماژە بۆ ئەوە بكەن، ئەو شەهیدانەی لە كارەساتی شنگار بە دەستی تیرۆریستان شەهید كران، چ خورتێت فەیلی، چ بارزانی چ 182 هەزار ئەنفال، چ ئەو ژن و زارۆكانەی بە ژەهر لە هەڵەبجە خنكێندران هەموویان بە ئێمە دەڵێن ئەگەر بمانەوێ نەوەی داهاتوو تووشی ئەم كارەساتە نەبنەوە تەنها رێگا ئەوەیە ئێمە سەربەخۆی ببین وبەرەو سەربەخۆیی بچین.

بۆ ئەم مەبەستەش دەستپێشخەریكمان بۆ هەموو لایەنە سیاسیەكانی كوردستان پێشكەش كردووە و هێڤیدارم بە شێوەیەكی بەرپرسانە مامەڵەی لەگەڵ دا بكرێت و من پێمخۆشە ئەم پرسە بەیەكەوە بڕیاری لەسەر بدەین چونكە ئەمە كارێكە پەیوەندی بە هەموو تاكێكی كورد و كوردستانی هەیە، پێویستە بەیەكەوە باش هەڵسەنگاندنی خۆمانی بۆ بكەین و بە شێوەیەكی بەرپرسانە مامەڵە لەگەڵ ئەم پرسە بكەین چونكە هیچ رێگای دیكە نەماوە.

ئێمە زۆر هەوڵمان دا برا بین شەریك بین و دواتریش هەر برا و دۆستین بەڵام دراوسێ بین، مادام شەراكەتتان پێ قبووڵ نیە با دراوسێ بین بۆ ئێمە و ئێوەش باشە، دراوسێ بین بە خۆشی و بە تەفاهوم لەگەڵ یەكتر بژین . ئێمە لە بارودخێك داین نە دەتوانین ئەو چەكەی دەمانەوێ بەدەستی بهێنین، نە بڕیاری تەواوی سیاسی خۆمان بەو شێوەیەی دەمانەوێ پێ چێ دبی بیدەین، نە لەڕووی داراییەوە دەتوانین وەكو ئەوەی دەمانەوێ بڕیار بدەین،بۆیە لێرەدا پێویستە یەك لەم دوو رێگایە هەڵبژێرین : یان ئەوەیە بەوە رازی ببین خەڵك لە جیاتی ئێمە بڕیار بدات و هیچ گازندەیەك نەكەین، یان پێویستە خودانی بڕیاری خۆمان بدەین و ئەمەش موجازەفە و جورئەتیشی دەوێت و هیوادارم هەموو تاكێكی كورد ئامادە بێت ئەو موجازەفەیە بكات وئەو جورئەتەیشی هەبێت ئەگەر نا دەبێ بەو واقیعە رازی ببین كە هەیە .

من نامەوێ لەوە زیاتر كاتی ئێوە بگرم و زەحمەت بە ئێوە بدەن بەڵام جارێكی دی دووپاتی دەكەمەوە، كوردستان وڵاتی ئێمەیە وڵاتی هەموومانە و هەموو خەڵكی كوردستان لەوە ئازادە چ ئایینێك هەڵدەبژێرێت و بیر و باوەڕی سیاسی خۆی هەڵبژێرێت،ئێمە هەموو بەندەی خواین و خوای گەورە خوای هەموومانە هەر كەسێك ئازادە لەوەی شێوازی خوا پەرستنی خۆی پەیڕەو بكات و هیچ كەسێك بۆ نیە ئایینی خۆی لەسەر كەسانی دیكە بسەپێنێت و هیچ كەسێكیش مافی ئەوەی نیە بڵێ تەنها من راستم ئەوانی دیكە هەموو هەڵەن، ئێمە هەموو بەندەی خواین و هەمووشمان برای یەكین و پێویستە پشت و پەنای یەكترین.

ئێستاش ئامادەكاری زۆر دەكرێت بۆ رزگاركردنی مووسل، رزگاركردنی مووسڵیش بۆ ئێمە زۆر گرنگە، و چۆن من بەڵێنم بە خوشك و برایانی ئێزیدی دا هەمان بەڵێن بە خوشك و برایانی مەسیحی دەدەم كە ناوچەكانی ئەوان رزگار بكەین و ئێوەش خودانی بڕیاری خۆتان دەبن.

جارەكا دی زۆر سوپاس بۆ هەمیا و هەزاران هەزار سڵاو بۆ گیانی هەمی شەهیدا

پەنا بە خوا سەركەفتی بن و دڵنیاش بن ئایندە بۆ ئێوەیە و رۆژانی تاریكی و ئەو مەترسیانەی هەن پەنا بەخوا تەواو دەبن.





SOURCE:: KRP PAGE HIT:: 1014