سەرۆكی هەرێمی كوردستان لەگەڵ ژماره‌یه‌ك مامۆستایانی سه‌ربه‌ وه‌زاره‌تی په‌روه‌رده‌ی حكومه‌تی هه‌رێم كۆبوویەوە


KRP.org | |


30/08/2017
رۆژی چوار شه‌ممه‌ 30ـی8ـی 2017 له‌ شاری هه‌ولێر، به‌ڕێز مه‌سعود بارزانی سه‌رۆكی هه‌رێمی كوردستان له‌گه‌ڵ ژماره‌یه‌كی زۆر له‌ مامۆستایان و به‌ڕێوه‌به‌ری قوتابخانه‌كانی شاری هه‌ولێر كۆبووه‌وه‌.

له‌سه‌ره‌تادا سه‌رۆكی هه‌رێمی كوردستان، ستایشی خۆراگری و ماندوێتی و ته‌حدییه‌كانی مامۆستایانی كرد، كه‌ به‌هۆی قه‌یرانی دارایی و كه‌می موچه‌وه‌ رێگه‌یان نه‌دا پرۆسه‌ی خوێندن له‌ قوتابخانه‌كان بوه‌ستێت و ئاماژه‌ی به‌وه‌كرد، به‌پیرۆزی ئه‌ركه‌كه‌تان و شانازیتانه‌وه‌ له‌ ساڵی 1991ه‌وه‌ تاكو ئه‌مڕۆ نه‌تانهێشتووه‌ پرۆسه‌ی خوێندن په‌كبكه‌وێ، ئه‌مه‌ سه‌روه‌رییه‌ بۆ خۆتان و میلله‌ته‌كه‌تان و شایه‌نی ئه‌وه‌ن به‌رده‌وام به‌ سوپاس و پێزانینه‌وه‌ ناوتان بهێنرێ.
له‌به‌شێكی دیكه‌ی وتاره‌كه‌دا سه‌رۆك بارزانی، تیشكی خسته‌سه‌ر رۆڵ و ئه‌ركی پیرۆزی مامۆستا له‌ پێگه‌یاندنی نه‌وه‌ی ئاینده‌ و مامۆستایانی به‌ داینه‌مۆی دروستكردنی سه‌ركرده‌ و نه‌وه‌یه‌كی ته‌ندروست بۆ میلله‌ت و كۆمه‌ڵگا وه‌سف كرد. به‌ئه‌ركی حكوومه‌تی هه‌رێمی كوردستانیشی زانی هه‌وڵه‌كانی بۆ باشتركردنی ژیان و گوزه‌رانی مامۆستایان چڕتر بكاته‌وه‌.

له‌باره‌ی پرسی رفراندۆمه‌وه‌ به‌ڕێز سه‌رۆك بارزانی ئاماژه‌ی به‌وه‌ كرد، ئه‌م بڕیاره‌ راسته‌ له‌ 7ـی حوزه‌یرانی ئه‌مساڵ هێزه‌ سیاسیه‌كان و گه‌لی كوردستان بڕیاری لێداوه‌، به‌ڵام ئه‌مه‌ مافێكی سروشتی هه‌رێمی كوردستانه‌ و هیچ شتێك له‌م پرۆسه‌یه‌ به‌نرختر نییه‌، به‌تایبه‌تی كه‌ شه‌راكه‌تی راسته‌قینه‌ و به‌شداریكردنی ئاره‌زوومه‌ندانه‌مان له‌گه‌ڵ به‌غدا هیچ ئه‌نجامێكی نه‌بوو، بۆیه‌ له‌ دانیشتنی 7ـی حوزه‌یرانی لایه‌ن و هێزه‌ كوردستانیه‌كان بڕیاردرا 25ـی ئه‌یلوول دیار بكرێت بۆ ئه‌نجامدانی ریفراندۆم.

سه‌رۆك بارزانی بڕیاری ئه‌نجامدانی رایفراندۆمی بۆ هه‌موو گه‌لی كوردستان گه‌ڕانده‌وه‌ و جارێكی دیكه‌ ره‌تیكرده‌وه‌، ئه‌م بڕیاره‌ تاك كه‌سی یا تاك حزبی بێت، به‌ڵكو ئه‌مه‌ هی گه‌لی كوردستانه‌ و به‌هیچ شێوه‌یه‌كیش له‌ ئەنجامدانی پاشگه‌زنابینه‌وه‌.

له‌ باره‌ی په‌یوه‌ندییه‌كانی نێوان هه‌ولێر و به‌غدا، سه‌رۆك بارزانی ئاماژه‌ی به‌وه‌كرد، به‌پێی چه‌ندین قۆناغ كورد به‌شی له‌وڵاته‌دا له‌ناوبردن و روخاندنی گوند و ئه‌نفال و كیمیبارانی بووه‌، له‌ ئێستایشدا ئاماده‌ نییه‌ ئاینده‌ی خۆی بداته‌ ده‌ست چاره‌نووسێكی نادیاره‌وه‌، بۆیه‌ بڕیاریداوه‌ به‌شێوه‌یه‌كی ئاشتیانه‌ و دوور له‌ توندتیژی ریفراندۆم ئه‌نجامبدات و ئاینده‌ی خۆی دیاری بكات.

سه‌رۆك بارزانی ستایشی بڕیاری ئه‌نجوومه‌نی پارێزگای كه‌ركووك و چه‌ند یه‌كه‌یه‌كی ئیداری ناوچه‌كانی ده‌ره‌وه‌ی هه‌رێمی كوردستانی كرد كه‌ بڕیاریانداوه‌ به‌شداری بكه‌ن له‌ ریفراندۆم و داوایشی كرد هیچ كاردانه‌وه‌یه‌ك به‌رامبه‌ر به‌و خه‌ڵكانه‌ نیشان نه‌درێ دژی ئه‌م بڕیاره‌ن، به‌ڵكو به‌شێوه‌یه‌كی برایانه‌ و له‌سه‌ر بنه‌مای پێكه‌وه‌ژیان له‌گه‌ڵیان مامه‌ڵه‌ بكرێت.

مامۆستایانیش لای خۆیانه‌وه‌ ته‌ئكیدیان كرده‌وه‌، به‌قه‌ڵه‌م و زانست و په‌روه‌رده‌ هه‌مان رۆڵی پێشمه‌رگه‌ ده‌بینین بۆ سه‌ربه‌خۆیی كوردستان و پشتیوانی له‌ ریفراندۆم و ده‌نگی(به‌ڵێ) بكه‌ن.

بۆ بینینی وتارەكەی سەرۆك بارزانی لە كۆبوونەوەكەی لەگەڵ ژماره‌یه‌ك مامۆستایانی سه‌ربه‌ وه‌زاره‌تی په‌روه‌رده‌ی حكومه‌تی هه‌رێمی كوردستان ئێرە دابگرە






SOURCE:: KRP PAGE HIT:: 322