سەرۆک بارزانی لەگەڵ کەسایەتیی و پیاو ماقوڵانی پێکهاتەکانی باشیک کۆبۆوە


KRP.org | |


16/11/2016
ڕۆژی چوارشەممە ١٦ـی١١ـی٢٠١٦ بەڕێز مەسعود بارزانی سەرۆکی هەرێمی کوردستان سەردانی شارۆچکەی تازەئازادکراوی باشیکی کرد و لەکۆبوونەوەیەکی جەماوەرییدا لەگەڵ کەسایەتی و پیاوماقوڵانی سەرجەم پێکهاتە نەتەوەیی و ئایینییەکانی ئەو شارە کۆبۆوە و وتارێکی پێشکەشی ئامادەبووان کرد.

لە سەرەتای وتارەکەیدا سەرۆک بارزانی سوپاسی پێشمەرگە قارەمانەکانی کرد و ڕای گەیاند سەری گەلەکەتان بەرز کرد و ئێستا نزیکی تەواوی خاکی کوردستان لەدەست تیرۆریستانی داعش پاک کراوەتەوە.

سەرۆک بارزانی شاری باشیکی وەک تابڵۆیەکی جوانی کوردستان وەسف کرد کە شانازیی پێوە دەکەین و تیایدا نەتەوەی جیا، ئایینی جیا و مەزهەبی جیا هەموو برایانە پێکەوە دەژین و ئەوە ئەو کوردستانەیە کە دەمانەوێ و پێشمەرگە خوێنی خۆی بۆی ڕشت کە هەموو تاکێک لەو وڵاتەدا ئازادە چی بیروباوەڕێک بۆخۆی هەڵبژێرێت و چی دین و مەزهەبێک بۆخۆی هەڵبژێرێت و لەهەر نەتەوەیەک بێت، پێش هەموو شتێک ئێمە لەو وڵاتەدا خوشک و برای یەکین.

سەرۆک بارزانی هەروەها گوتی: ئەوە ئەو تابڵۆ جوانەیە کە ئێمە شانازیی پێوە دەکەین، مه‌لا لە مزگەوت بانگ ده‌دات، له‌ كڵێسه‌كانه‌وه‌ زه‌نگ لێ دەدرێت و ئێزدييه‌كانيش له‌ په‌رستگه‌ پەرستشی خۆیان بەجێ دەگەیەنن. ئەوە ئامانجی ئێمەیە و هەر واش دەمێنێتەوە. پێشمەرگە خوێنێ خۆی ڕشت بۆ ئەوەی خاکی کوردستان ڕزگار ببێت و ئەو بەها مەزنانە بپارێزێت.

سه‌رۆك بارزانى گوتيشى: زۆر كه‌س ده‌پرسن بۆچى ده‌بێت پێشمه‌رگه‌ شه‌ڕى مووسڵ بكات؟ له‌ وه‌ڵامى ئه‌وانه‌دا ده‌ڵێم تا مووسڵ ئارام نه‌بێت، ئاسايشى هه‌رێمى كوردستان مه‌ترسى له‌سه‌ر ده‌بێت.

هه‌روه‌ها گوتى: چاره‌نووسى مووسڵ بۆ ئێمه‌ زۆر گرینگه‌ چونكه‌ پێش هاتنى داعش 300 هه‌زار كورد له‌ مووسڵ ده‌ژيان.

له‌ درێژه‌ی قسه‌كانیدا سه‌رۆك بارزانى گوتيشى: ئێمە رێككەوتنێكمان لەگەڵ ئەمەریكادا هەیە، بەشێوەیەكی روونتر، لەنێوان وەزارەتی پێشمەرگەی هەرێمی كوردستان و وەزارەتی بەرگری ئەمەریكا (پینتاگۆن) هەروەها لە نێوان وەزارەتی پێشمەرگە و حكومەتی عیراق بەوەی ئەو هێلەی بەرگری پێشی شەڕی رزگاركردنی مووسڵ بە هیچ شێوەیەك گفتوگۆی لەسەر ناكرێت، ئەو هێلەی ئێستا ئێمە تیایداین ئامانجمان لەبارەیانەوە ئەوەیە ئاسایشی ئەوان و خەڵكی ناوچەكە پارێزراو بێت و پێشمەرگە پشتیوانیان دەكات، رێككەوتنمان هەیە لەگەڵ سوپای عیراق بەوەی پێشمەرگە دەچێتە كوێ و سوپای عیراق دەچێتە كوێ و لەكوێ لەگەڵ یەكتر دەبین و لەكوێش بە تەنیا دەبین بەڵام یەك شتتان پێ دەڵێم ئێمە جارێكی دی ناهێڵین و ناهێڵین ئاوارە ببن و كەس دەست بۆ ئێوە درێژ بكات، لەوە پشتڕاست بن و هیچ تەسەورێكی هەڵەتان بۆ دروست نەبێت و ئێمە بە رێككەوتنەكان پابەندین بەڵام ئەو رێككەوتنەی كە گەرەنتی ئایندەی ئێوە بكات

ئاماژه‌شى بۆ ئه‌وه‌ كرد، له‌ سه‌ره‌تاى هاتنى داعشدا کەسانێک بوونه‌ چاوساغ و هاوکاری داعش، ئێستا ئەگەر ئه‌وانه‌ بیانهەوێ به‌ ناوى ئاواره‌ رووبكه‌نه‌ ئه‌و شوێنانه‌ى پێشمه‌رگه‌ رزگاری كردوون، ئه‌وا به‌ دڵنياييه‌وه‌ به‌ هيچ شێوه‌يه‌ك رێگه‌ ناده‌ين و ئه‌وانه‌ى بوونه‌ هاوبەشی تاوانى داعش هەمان چارەنووسی داعشیان دەبێت.

سه‌رۆك بارزانى جه‌ختى له‌سه‌ر ئه‌وه‌ كرده‌وه‌، ئه‌وانه‌ى ده‌ستدرێژى و تاوانيان له‌ دژى كچانى ئێمه‌ ئه‌نجام داوه‌ له‌ هه‌ر كوێ بن ده‌بێت باجى ئه‌و تاوانانه‌ بده‌ن و تۆڵه‌يان لێ ده‌كرێته‌وه‌.

سه‌رۆكى هه‌رێمى كوردستان رووی كرده‌ ئه‌و رێكخراوانه‌ى كورد تۆمه‌تبار ده‌كه‌ن به‌ تۆڵه‌كردنه‌وه‌، گوتى: هه‌رێمى كوردستان زياتر له‌ يه‌ك مليۆن و نيو ئاواره‌ى له‌ خۆ گرتووه‌، ئه‌وه‌ بۆ له‌به‌رچاو ناگرن؟ ئه‌وان هه‌رچۆن بيرده‌كه‌نه‌وه‌ ئاساييه‌، به‌ڵام ئه‌وه‌ سياسه‌تى ئێمه‌يه‌ و ئێمه‌ به‌ هيچ شێوه‌يه‌ك رێگه‌ به‌ تاوانباران ناده‌ين به‌ ناوى ئاواره‌وه‌ بگه‌ڕێنه‌وه‌ ئه‌و ناوچانه‌.

سه‌رۆك بارزانى لە وتەکەیدا باسى له‌ پرسه‌ ناوخۆييه‌كان كرد و گوتى: هه‌ندێك كه‌س هه‌وڵيان دا كوده‌تا ئه‌نجام بده‌ن، من دوو پرسياريان لێده‌كه‌م، ئايا وه‌زعى پێش كوده‌تان باش بوو يان ئێستا، ئێوه‌ چيتان به‌ده‌ست هێنا و چيتان گۆڕى؟ چه‌ندى ديكه‌ش خۆتان ماندوو بكه‌ن هيچتان ‌ده‌ست ناكه‌وێت و ئامۆژگاريتان ده‌كه‌م خۆیان ماندوو نەکەن و وەک پێشتر هیچیان دەست ناکەوێت.

هه‌روه‌ها گوتى: ئه‌گه‌ر ده‌تانه‌وێت فه‌رموون، هه‌ميشه‌ ئێمه‌ له‌گه‌ڵ چاره‌سه‌رى ئاشتيانه‌داين، ئه‌گه‌ر هه‌ر سوورن له‌سه‌ر كوده‌تا، عيلاجى كوده‌تا زۆره‌ و به‌ هيچ جۆرێك زۆرى هيچ كه‌سێك قبوڵ ناكه‌ين.

سه‌رۆك بارزانى رووي كرده‌ ئه‌و لايه‌نانه‌ى دڵسۆزی گەلن و هەست بە بەرپرسیارێتی دەکەن و گوتى: ئێوه‌ له‌گه‌ڵ ئه‌وانه‌ مه‌بن كه‌ هيچ خه‌مى ميلله‌تيان نييه‌، فه‌رموون ئێوه‌ كۆببنه‌وه‌ و بڕيار بده‌ن، ئه‌گه‌ر نا، كات ده‌ڕوات و ئێمه‌ش چاوه‌ڕوانى كه‌س ناكه‌ين.

سه‌رۆك بارزانى باسى له‌وه‌ش كرد، هه‌ندێك گرەوەیان لەسەر ئەوە کردبوو کە دووبەرەکی لەنێوان پێشمەرگە دروست بێت، به‌ڵام خۆشبه‌ختانه‌ پێشمەرگەی قارەمان سەلماندیان کە کوڕی کوردستانن و لە بازنەی حزبایەتی دەرچوون و بەرگریی لە وڵاتی خۆیان و کەرامەت و ناموسی گەلی خۆیان دەکەن و بينيمان پێشمه‌رگه‌ و رۆڵه‌ى پارچه‌كانى ديكه‌ى كوردستانيش به‌يه‌كه‌وه‌ خوێنيان لە یەک سەنگەر تێکەڵ بوو و ئه‌وه‌ش گه‌وره‌ترين ده‌ستكه‌وت و سەرکەوتنە بۆ كوردستان.

سه‌رۆك بارزانى گوتیشی: هه‌ندێك ده‌ڵێن كوا سه‌ربه‌خۆیی و راپرسى، لێره‌وه‌ ده‌ڵێم سه‌ربه‌خۆيى مافى ره‌واى كورده‌، به‌ڵام ئه‌وه‌ پرۆسه‌يه‌كه‌ و پێويستى به‌ وتوێژ و گفتوگۆ هه‌يه‌ و له‌ سه‌ردانى ئه‌م دواييه‌شدا بۆ به‌غدا ئه‌وه‌مان باس كرد و خۆشبه‌ختانه‌ وه‌ڵامى ئه‌رێنى هه‌بوو، ئه‌وه‌ش جێگه‌ى دڵخۆشييه‌، ئه‌وه‌ پرۆسه‌يه‌كه‌ ئێمه‌ ده‌ستى لێ هه‌ڵناگرين و ئه‌گه‌ر له‌گه‌ڵ به‌غدا گه‌يشتينه‌ رێككه‌وتن ئه‌وه‌ ڕەنگە پێويست به‌ ريفراندۆم نەكات، ئەگەر پێویستیش بکات ئاسانتر دەبێ، به‌ڵام ئه‌گه‌ر زانيمان ناگه‌ينه‌ رێككه‌وتن ئه‌وا ئێمه‌ راپرسى خۆمان ده‌كه‌ين.

هه‌روه‌ها گوتى: ئەوانەی ئێستا دڵی خۆیان بەو بابەتە خۆش کردووە، وەڵامی من بۆیان ئەوەیە، ئەو لوغمانەی داعش داینابوون و پێشمەرگە هەڵیگرتنەوە و کوردستانی پاک کردەوە، ئەو لوغمە سیاسییانەی ئێوەش لەسەر ڕێگای ئێمە داتان ناوە، زۆرمان هەڵگرتنەوە و ئەوانی دیکەش هەڵدەگرینەوە.

سه‌باره‌ت به‌ پرسى فيدراڵييه‌تى پارێزگاكان، سه‌رۆك بارزانى گوتى: ئەو خوێنەی تا ئەمڕۆ ڕژاوە ئاوا ئاسان نییە پشتگوێیان بخەین، تا ئەمڕۆ 11 هەزار و 500 ئازیزی ئێمە شەهید و بریندار بوون، تازە بە تازە دەتانەوێ بگەڕێینەوە سیستەمی فیدراڵیزمی پارێزگا؟ ئێمە لە كاتی خۆیدا لەگەڵ برێمەر شەڕی ئەوەمان كرد، ئێمە ئەوكات شەڕی ئەوانمان كرد کە لەگەڵ بریمەر ویستیان پیادەی بکەن و قسە و هەوڵی ئەوان سەری نەگرت، ئەمڕۆش ئەوەی ئەوان دەیكەن یاری كردنە بە خوێنی شەهیدان و مومكین نییە رێگەی پێ بدرێت.

بۆ بینینی تەواوی وتەکانی سەرۆک بارزانی لێرە کلیک بکە


ب ناڤێ خودێ مەزن و دلوڤان

بەرێ هەر تشتەكێ پیرۆزباییەكی گەرم لەئێوەی بەڕێز و هەموو خەڵكی كوردستان دەكەم بۆ ئەو سەركەوتنە مەزنەی بە دەستی پێشمەرگە قارەمانەكان بە دەستهات . سوپاس بۆ خودێ مەزن و جارەكا دی سوپاس بۆ پێشمەرگەی قارەمان ، بەڕاستی هیچ وشەیەك نیە سوپاسی ئێوەی پێ بكەم تەنها ئەوەیە كە ئێوە سەری ئێمە و سەری میللەتێ خۆ بڵند كر و دەست و چاوی هەمووتان ماچ دەكەم .

سوپای بۆ خوای گەورە ئەمڕۆ تەقریبەن هەموو خاكی كوردستان لە تیرۆریستانی داعش هاتنە باقژكرن، و ئێمە لێرە لە باشیكا و لەو شارە جوان و پاقژە ، لە شاری زەیتوون كۆ بووینەتەوە، ئەمە ئەو تابلۆ جوانەی كوردستانە كە شانازی پێوە دەكەین بە هەبوونی نەتەوەو و ئایین و مەزهەبی جیا كە پێكەوە دەژین و هەمووان بە برایانە و خۆیانە پێكەوە دەژین و ئەمەش ئەو كوردستانەیە كە ئێمە دەمانەوێ ، دروست ئەو كوردستانەیە كە پێشمەرگە خوێنی خۆی بۆ ڕشت و هەموو تاكێكی ئەم وڵاتە تیایدا ئازادە بەوەی چ بیر و باوەڕ و ئایین و مەزهەب بۆ خۆی هەڵدەبژێرێت و لە هەر نەتەوەیەك بێت بەری هەر تشتەكێ ئێمە خوشك و برای یەكترین لەم وڵاتە.

جارەكا دی دبێژم، ئەوەی دەیبینین تابلۆیەكی جوانە كە ئێمە شانازی پێوە دەكەین، مەلا بانگی خۆی لە مزگەوتدا دەدات، كلێسا زەنگی خۆی لێدەدات، ئێزدی لە پەرستگەها خۆ تاعەت و عیبادەتی خۆیان دەكەن،دروست ئەوەیە كو مە دڤێت، و پەنا بە خوا هەر واش دەمێنێت .

پێشمەرگە خوێنی خۆی رشت بۆ رزگاركردنی خاكی كوردستان و ئەو بەها مەزنانە بێنە پاراسان و هیڤیا مە ئەوە باشیك و جهێ دیش ببنە نموونە بۆ ئەم پێكەوەژیانە.

بەڕێزان ..

نها سەردەمێكی نوێیە و داعش بەرەو شكستێكی مەزن دەچێت، ئەو هاروكاریەی لە نێوان پێشمەرگە و سوپای عیراق بە پشتەڤافیا هاوپەیمانان هاتنە ئاراوە سەركەوتنی مەزنی لێكەوتەوە و داعش بەرەو شكستی گەورە دەچن و ئەمەش دەبێتە بنەمایەك بۆ ئایندە كە پەیوەندی خۆمانی لەسەر ئاوەدان بكەین.

زۆر دەپرسن ئەرێ كارێ مە بە مووسڵ چیە؟ وەڵامی ئێمە ئەوەیە : تا مووسڵ لە ژێر هەڕەشەدابێت هەرێمی كوردستان لە ژێر هەڕەشەدایە و تا تیرۆریستان لە مووسڵ دا بن ناتوانین بڵێین ئێمە لە ئارامیدا دەژین و هەموو كاتێك لەژێر هەڕەشەدا دەبین، بەری هەر تشتەكێ بۆ ئاسایشی هەرێمی كوردستان و خەڵكی هەرێمی كوردستان بەشداریكردنی پێشمەرگەی قارەمان لە رزگاركردنی مووسڵ كاریگەری زۆری هەبوو و ئەمە جگە لە گرنگی دیكە لە ڕووی ئابووری و كۆمەڵایەتیەوە و سەرەڕای ئەوەش ئێمە رێز و حورمەتمان هەیە بۆ هەموو نەتەوەی دیكە بەڵام بەری كو داعش بێت زیاتر لە 300 هەزار كورد لە مووسڵ دا دەژیان و بۆ ئێمە چارەنووسی ئەوانیش زۆر گرنگە و نەك تەنها چارەنووسی ئەوان بەڵكو هی عەرەب و توركمان و موسڵمان و مەسیحی و ئێزدی ، ئەوەی ئەم پرسیارە دەكەن، با بیر لەوە بكەنەوە شارێك 300 هەزار كورد تیایدا بژی چۆن دەبێ ئێمە پشتی خۆمانیان لێ بكەین؟

هەروەها من جارجار گوێبیستی ئەوە دەبم كە هەندێك كەس لە ئایندەی خۆی و ئەو ناوچەیە نیگەرانە ومن بە راشكاوی دەڵێم : خوێنی ئەو شەهید و ئازیز و خۆشەویستانە بۆ ئەوە نەهاتە ڕیِتن تا ئەو ناوچەیە جارێكی دیكە تووشی ئێش و ئازار ببێت .

ئێمە رێككەوتنێكمان لەگەڵ ئەمەریكادا هەیە، بەشێوەیەكی روونتر، لەنێوان وەزارەتی پێشمەرگەی هەرێمی كوردستان و وەزارەتی بەرگری ئەمەریكا (پینتاگۆن) هەروەها لە نێوان وەزارەتی پێشمەرگە و حكومەتی عیراق بەوەی ئەو هێلەی بەرگری پێشی شەڕی رزگاركردنی مووسڵ بە هیچ شێوەیەك گفتوگۆی لەسەر ناكرێت، ئەو هێلەی ئێستا ئێمە تیایداین ئامانجمان لەبارەیانەوە ئەوەیە ئاسایشی ئەوان و خەڵكی ناوچەكە پارێزراو بێت و پێشمەرگە پشتیوانیان دەكات، رێككەوتنمان هەیە لەگەڵ سوپای عیراق بەوەی پێشمەرگە دەچێتە كوێ و سوپای عیراق دەچێتە كوێ و لەكوێ لەگەڵ یەكتر دەبین و لەكوێش بە تەنیا دەبین بەڵام یەك شتتان پێ دەڵێم ئێمە جارەكا دی ناهێڵین وناهێڵین ئاوارە ببن و كەس دەست بۆ ئێوە درێژ بكات، لەوە پشتڕاست بن و هیچ تەسەورێكی هەڵەتان بۆ دروست نەبێت و ئێمە بە رێككەوتنەكان پابەندین بەڵام ئەو رێككەوتنەی كە گەرەنتی ئایندەی ئێوە بكات.

بە داخەوە لەو دەڤەرانەی رزگاركراون، خەڵكێك تیایاندا پێشوازیان لە داعش كرد و چاوساغیان بۆ كردن و هاریكاریان كردن و بوونە بەشێك لە داعش و بوونە هاوبەشی تاوانی داعش، ئەمڕۆ ئەوان بە ناوی ئاوارە و شتی دیكە مەحاڵە یەك لەوان پێ بنێتە هەر شوێنێك كە پێشمەرگە بە خوێنی خۆی رزگاری كردبێت.

قسەكانمان لێرە بە شێوەیەكی تایبەت ئاراستەی ئەوانە كە دەستیان بۆ نامووسی كچكێت مە درێژ كردووە و تا یەك نەفەریان لێ مابێت لە هەر شوێنێكی دونیا بن دەستمان پێیان بگات وازیان لێ ناهێنین و تۆڵەی خۆمانیان لێ دەكەینەوە، وهەر كەسێكی بێ گوناهیش بە غەدر ئازار و ئەشكەنجە درابێت ئێمە لەگەڵ ئەوەدا نین، ئەوانەی بە حوكمی داعش رازی نەبوون و ماڵ و حاڵی خۆیان بەجێهێشت و هاتنە هەرێم و پەنایان بۆ هەرێمێ هێنا ئەوان برا و ئازیزێ مەنە و سەر سەر و سەرچاوی ئێمە هاتن و هیچ جیاوازیەك لەنێوان ئێمە و ئەوان دا نیە و ئێمە دەیانپارێزین بەڵام ئەوانەی لەگەڵ داعش چوون عەرەب بن كورد بن توركمان بن ئەوان دوژمنی ئێمەن وهەمان مامەڵەی داعشیان لەگەڵ دەكەین ، ئەوە سیاسەتی ئێمەیە و ئەو رێكخراوانەی گرنگی بە بواری مافی مرۆڤ دەدەن و لەو بوارەدا كار دەكەن پێویستە باش بزانن ئەوەیە سیاسەتی ئێمە بەڵام هەق وایە لەوەدا مونسیف بن كە گەلی كوردستان خاك و دڵی خۆی بۆ یەك ملیۆن و نیو ئاوارە كردەوە، ئەگەر وەك ئەوان دەڵێن سیاسەتی ئێمە وابێت ئێمە جیاوازی لەو بوارەدا بكەین و تەعەددا لەوان بكەین و مافی خەڵكی دیكە بخۆین، چۆن ماڵ و دڵ و دەروونی خۆمام بۆ یەك ملیۆن و نیو كەس بكەینەوە، ئێمە رێزمان بۆ ئەو رێكخراوانە هەیە كاری ئەوان پیرۆزە بەڵام پێویستە مونسیف بن، بەڵام ئەگەر مەبەست ئەوە بێت ئەوانەی هاروكاری داعشیان كردووە بێنەوە ماڵ و شوێنی خۆیان وەكو جاران، چیمان پێ دەڵێن با بڵێن، جارەكا دی ئەوان ناگەڕێنەوە و چارەنووسی ئەوان وەكو چارەنووسی داعش دەبێت.

ئەوەیە سیاسەتی ئێمە، كە زۆر رون و ئاشكرایە و هیچ كاتێك سازش لەسەر ئاسایشی هەرێمی كوردستان ناكەین لەگەڵ هیچ لایەنێك.

سوپای بۆ خودێ مەزن و سوپاس بۆ پێشمەرگەی قارەمان، ئێستا مەترسی داعش تاڕادەیەكی زۆر لەسەر هەرێمی كوردستان دوور كەوت، باشیك بەری چەند رۆژەكێ لە ژێر حوكمی داعش دا بوو و ئێستا سوپاس بۆ خوای گەورە ئێمە چەند كیلۆمەترێك لە مووسڵ دوورین و پەنا بەخوا چەند رۆژێكی دیكە مووسڵیش رزگار دەبێت و هەر چەندە شەڕەكەش ئاسان نیە بەڵام ئێمە ئومێدمان بەوە زۆرە كە كۆتایی پێبێت.

بەڵێ ئێستا مەترسی داعش لەسەر هەرێمی كوردستان دوور كەوت بەڵام نابێ ئێمە رابردوو لەیاد بكەین، كاتێك لە ساڵی 2003 رژێمی بەعس رووخا ئێمە گوتمان سوپاس بۆ خوا ئێمە حەساینەوە و ئەمە دەرفەتێكی باشە، زۆری پێ نەچوو تووشی بەڵای ئەنساڕولئیسلام و قاعیدە بووین، دوای ماوەیەك كابرایەك كە لەسەر ملی كوردا بوویە حاكم لە بەغدا هیچ وەفایەكی بۆ رۆڵ و پشتیوانی كورد نەبوو، نانی كوردی بڕی و چاوەڕوانی دەكرد فڕۆكەی F16 ی بۆ بێت و كوردستانی پێ بۆردومان بكات ، پشتی وێ بەڵای داعشمان بەسەردا هات، و بەهۆیەوە خوێنی ئازیزترین ئازیزی ئێمە لەم شەڕانەدا رژا و لە ئێمە دوور كەوتنەوە، من دەزانم چ قارەمان و ئازیز و كەسانێكمان لەدەست دا كە نرخی ئەوان بەهیچ نایەتە خەمڵاندن، بەڵام ئەوەی دڵی میللەت پێی خۆشە ئەوەیە ئەوان میللەتێكیان پاراست، شەڕەفی میللەتێكیان پاراست. ئێمە نازانین لە دوای داعش تووشی چ بەڵایەكی دیكە دەبین نابێ ئێمە تەخمینی ئەوە بكەین كە داعش تەواو بوو و دواتر پشتی خۆمان لە بارودۆخەكە بكەین و بڵێین ئیدی هیچ مەترسیەكمان لەسەردا نەما چونكە وا دیارە ئەو تەحەددا و هەڕەشانە لەسەر هەرێمی كوردستاندا ماون بۆیە پێشمەرگەش بەردەوام دەبێت و بەری نها ئێمە چەند گرنگیمان بە بارودۆخی پێشمەرگە دەدا لەمەولا چەند بەرابەر گرنگی بە پێشمەرگە دەدەین، خۆمان رێك دەخەین و چەكی خۆمان نوێ دەكەین مەشقی خۆمان باشتر دەكەین و ریزەكان رێكتر دەكەین و بۆ هەموو هەڕەشەیەك ئامادە دەبین و هیچ كاتێك سیاسەتی ئێمە ئەوە نەبووە بچینە سەر خاكی كەس و خاكی خەڵكی دیكە داگیر بكەین بەڵام پێویستە ئامادەی هەر هەڕەشەیەك بین ئەگەر یەكێك چاوی تەماعكاری خستە وڵاتی ئێمە بۆ بەرگریكردن ئامادە بین و ئەو ئەزموونەی بەسەر ئێمەدا هات جارێكی دیكە دووبارە نەبێتەوە.

لەبارەی بارودۆخی ناوخۆوە، ڕاستە بەهۆی شەڕەوە ڕەنگە كاتی ئەوەمان نەبوو باسی بارودۆخی نێوخۆی هەرێمی كوردستان بكەین بەڵام ئێستا كاتی ئەوە هاتووە چەند قسەیەك لەبارەی هەلومەرجی ئێستای كوردستان و بارودۆخی ئێستای هەرێم بكەین.

دوو ساڵە گەلی كوردستان لەشەڕێكی سەخت وخوێناوی دایە لەگەڵ خراپترین ودڕندەترین رێكخراوی تیرۆریستی جیهانی كە ناوی داعشە، ئەوەی ئێمە بینیومانە و بیستوومانە كاتێك میللەتێك بكەوێتە مەترسیەكی مەزن، هەموو دڵسۆز و خەڵكی ئەم وڵاتە یەك دەگرن و گرفتەكانی خۆیان وەلا دەنێن و بە یەكگرتوویی خۆیان كار بۆ ئەوە دەكەن ئەو مەترسیە لە وڵاتی خۆیان دوور بكەنەوە . ئێمەش ئەو پێشبینیەمان هەبوو بەوەی لایەنی كوردستانی بە یەكڕیزی ڕووبەڕووی دوژمن بوەستن و پشتیوانی پێشمەرگە بكەن.

بەڵام جێگەی داخە كە بینیمان هەندێك لایەن چ بارودۆخێكیان دروست كرد كە هیچ پێویست نەبوو وا بكەن ، لە كودەتا دەستیان پێكرد و تا گەیشتە سووتاندنی بارەگا و كوشتنی خەڵك، پرسیاری من بۆ ئەوان ئەوەیە : ئەرێ بارودۆختان بەرێ هەوڵی كودەتا باشتر بوو یان ئێستا؟ پرسیاری دووەمی من ئەوەیە : ئێوە چیتان بەدەست هێنا، چیتان گۆڕی؟ چیتان دەست كەوت؟ بۆیە من لێرەدا دووپاتی دەكەمەوە : چەندی دیكەش خۆتان ماندوو بكەن و هەوڵی كودەتا بدەن هیچ شتێكتان دەست ناكەوێ، ئامۆژگاری من بۆ ئەوان ئەوەیە : خۆتان ماندوو مەكەن، چونكە پێشی ئێستا چیتان دەست كەوت ئێستاش هەر ئەوەندەتان دەست دەكەوێت، رێكا راست و داخاز و داوا و ویستی من بۆ هەموو حزب و لایەنەكان ئەوەیە هەموویان كۆ ببنەوە بە دڵێكی پاقژ و مێشكەكا ڤەكری كار بۆ چارەسەر كردنی گرفتەكانمان بكەن، رۆژ رۆژی ئەوەیە بزانین گرفتەكانمان چین و چارەسەریان بكەین، بەڵێ گرفت زۆرن و گلەیی و گازندە هەنە و زۆریشن من زۆر گلەیی و گازاندەم هەنە و هەر كەسێكیش بەقەد خۆی گلەیی و گازاندەی لەبارەی ئەو بارودۆخەوە هەیە و تێبینی هەیە ، وەرن بەیەكەوە دابنیشین با چارەسەری ئەو گرفتانە بكەین و ئەگەر نیەتی پاك بۆ چارەسەری هەبێت بێگومان چارەسەریش ئاسان دەبێت و منیش بە هەموو هێزێكمەوە پشتیوانی لێ دەكەم. بەڵام ئەگەر بەردەوام مكوڕ بن لەسەر كودەتا و بتانەوێ بەزۆر گرفتەكان چارەسەر بكەن و ئەو وەهمەی كە بۆ هەندێك لایەن دروست بووە ئەوە جێبەجێ بكەن ، بەڕاستی لێرەدا دووپاتی دەكەمەوە : بەهیچ شێوەیەك زۆری كەس ناهێتە قبوڵكردن .

خواستی من لەو دڵسۆزانەی دڵیان بۆ ئەو میللەتە دەسووتێ و هەست بە بەرپرسیارێتی دەكەن خۆیان لەگەڵ خواست و ویستێكدا نەگرن كە ئایندە و چارەنووسی ئەو میللەت و ئەم وڵاتە بە هەند نەگرێت، با كۆببنەوە و بڕیاری خۆیان بدەن چونكە كات وا دەڕوات و دەرفەتیشمان لەدەست دەچێت و ئەو كاتیش نابێ هیچ كەسێك گازندەیی و گلەیی بكات لەوەی كە ڕوودەدات چونكە ئێمەش چاوەڕوانی كەسی دیكە نابین.

خاڵێكی دیكەی زۆر گرنگ هەیە كە پێمخۆشە ئاماژەی بۆ بكەم، گرەوی زۆر لەسەر ئەوە دەكرا كە پێشمەرگە لەناو بچن و دووبەرەكی دروست ببێت و خوا نەخواستە شەڕی براكوژی و خۆكوژی دروست دەبێتەوە، بەڵام پێشمەرگەی قارەمان سەلماندی كوڕێت كوردستانێنە و لە قۆناغی حزبایەتی تەسك دەرچوون و بەرگری لە وڵاتی خۆیان و كەڕامەت و شەرەف و نامووسی خۆیان دەكەن، خوێنی پێشمەرگە لە یەك سەنگەر تێكەڵ بوو، لەهەموویشی گرنگتر بۆ ئێمە ئەوەیە خوێنی كوڕ و كچی هەموو پارچەكانی كوردستان لەیەك سەنگەردا تێكەڵ بوون كە ئەمە مەزنترین دەستكەوتە بۆ ئێمە .

لەلای من ئەو یەكڕێزی و قارەمانێتی پێشمەرگە و هەستكردن بە بەرپرسیارێتی مێژوویی لەلایەن پێشمەرگەوە مەزنترین دەستكەوت و مەزنترین سەركەوتن بوو، و ئەمەیە هانمان دەدات هەنگاو بەرەو ئایندەیەكی رون بهاوێژین چونكە پشتی ئێمە بە خودێ و پێشمەرگەی قارەمان گەرمە، پێشمەرگە سەلماندیان كوڕی ئەم كوردستانەن و نابنە یاری بەدەستی ئەم حزب و ئەو حزبەی دیكە.

شتێكی دیكە كە دیسان ئەوان دڵی خۆیان پێ خۆش دەكەن و دەپرسن : كوا سەربەخۆیی و كوا ریفڕاندۆم؟ من هەمیشە گوتوومە پرسی سەربەخۆیی مافێكی ئاسایی میللەتی ئێمەیە و دەستی لێ هەڵناگرین لەژێر هیچ بارودۆخ و هیچ فشارێك، بەڵام هەموو جاری گوتوومە ئەمە پرۆسەیەكە پێویستە بە خۆشی و بە دوور لە توندو تیژی و بەگفتوگۆ بێتەدی، لەدوایین سەفەریشمان دا بۆ بەغدا ئێمە باسی ئەو پرسەمان كرد و زۆر بەڕوونی تیشكمان خستە سەری و جێگەی خۆشحاڵیە كە تەجاوبێكی باشی لەگەڵ دا هەبوو ئەمەش باشترین رێگایە بۆ ئەوەی بەیەكەوە بگەینە ئەنجامێك بەوەی مادام نەمانتوانی لەیەك وڵاتدا هاوبەشی یەكتر ببین و شەراكەتێكی ڕێك و پێك دروست بكەین با دراوسێیەتیەكی ڕێك و پێك دروست بكەین وببینە برا و دراوسێی یەكتر و هاوكاری و هاریكاری یەكتر بكەین، مادام نەمانتوانی ئەم هاوبەشیە دروست بكەین نابێ جارێكی دیكە بكەوینە قۆناغی شەڕ و خوێنڕشتن، با رێگە لە خوێنڕشتن بگرین و رێگە لە گرفتی گەورەتر بگرین.

ئێمە دەست لەو رێگەیە هەڵناگرین، ئەگەر لەم بارەیەوە گەیشتینە رێككەوتن لەگەڵ بەغدا رەنگە ئەمە پێویستی بە ریفراندۆم هەر نەبێت، ئەگەر پێویستیشی كرد رەنگە ئەو كاتیش ئاسان بێت و ئیعتیباری زیاتری بۆ هەبێت لە دەرەوەش زیاتر و بەبێ گرفت پشتیوانیمان لێدەكەن. بەڵام لە هەموو بارودۆخێكدا دەست لەو پرۆسەیە هەڵناگرین ئەگەر گەیشتینە رێككەوتن زۆر باشە ئەگەر نا ریفراندۆمی خۆمان دەكەین و ئەوان دڵی خۆیان خۆش دەكەن و ماددەیەكیان كەوتۆتە دەست بۆ دڵخۆشكردنی خۆیان ، وەڵامی من بۆ ئەوان ئەوەیە : ئەو مین و بۆمبی چێندراوانەی داعش بۆ پێشمەرگەی داناوە و پێشمیەرگە هەڵی دەگرێـت و كوردستانی لێ خاوێن دەكرێت، دروست قسەكەی من بۆ ئەوانەیە كە گرفت دروست دەكەن، ئەو مین و بۆمبە سیاسیانەی بۆ ئێمەتان داناوە و لەسەر رێگەی ئێمەتان داناوە زۆرمان لێیان هەڵگرت و زۆری دیكەش هەڵدەگرین.

ئنجا تا ئەو كاتە شت دەنووسن، هەڵدەپەڕن ، هەواڵ بڵاو دەكەنەوە، بەڕاستی پێتان دەڵێم چی دەكەن بیكەن نە گوێتان لێ دەگرین و هیچ حیسابێكتان بۆ ناكەین.

نوكە تازە بە تازە جەنابی كەسانێك دێن و دەڵێن سیستەمی سیاسی بكەینە سیستەمی پارێزگا، ئەو خوێنەی تا ئەمڕۆ هاتۆتە ڕێشتن ئاوا ئاسان نیە پشتگوێیان بخەین، تا ئەمڕۆ 11 هەزار و 500 ئازیزی ئێمە شەهید و بریندار بوون، تازە بە تازە دەتانەوێ بگەڕێینەوە سیستەمی فیدراڵیزمی پارێزگا؟ ئێمە لەسەر ئەو مەسەلەیە شەڕمان لەگەڵ برێمەردا كرد، ئێمە لە كاتی خۆیدا لەگەڵ برێمەر شەڕی ئەوەمان كرد ئەو سیستەمە نەخرێتە نێو ئەجەندای سیاسیەوە، ئێمە ئەوكات شەڕی ئەوانمان كرد و قسە و هەوڵی ئەوان سەری نەگرت، ئەمڕۆش ئەوەی ئەوان دەیكەن یاریكردنە بە خوێنی شەهیدانە و مومكین نیە رێگەی پێ بدرێت.

لە كۆتاییدا سوپاسی بێ پایانمان بۆ خودێ مەزن و دواتر بۆ گەلی كوردستان و سوپاس بۆ پێشمەرگەی قارەمان و هاوپەیمانان و هەموو لایەنێك كە لەم شەڕەدا هاروكاری ئێمەیان كرد، جێی شانازیە پێشمەرگە بوونە سیمبولی قارەمانی كە هەموو دونیا شانازیان پێوە دەكات و مافی ئەوانیشە شانازیان پێوە بكەن چونكە ئەوەیان سەلماند كە شایستەی شانازی پێكردنن، ئەو چەكەی بە دەستی پێشمەرگەوە بوو و توانیان سەركەوتنی گەورەی پێ تۆمار بكەن، ئەگەر لە دەستی سوپای دیكە بوایە پێم وانیە بیانتوانیبا سەركەوتنی وا گەورەی پێ تۆمار بكەن.

بەڕاستی خۆم زۆر لەوە كەمتر دەزانم لەبارەی پێشمەرگەوە قسە بكەن، بەڕاستی نازانم لەئاستی ئەوان چ بڵێم، بڵێین سڵاو لە گیانی ئەوان و جێگەی ئەوان بەهەشت بێت ، بەڕاستی هەر چی بڵێین لە ئاستی ئەوان هێشتا كێمە تەنها ئەوە دەڵێین جێی شاناز و سەربەرزیە ئەوان شەرەف و نامووس و میللەتێكیان پاراست، ئەوە مەزنترین شەرەفە، نەوەكو قارەمانی وا چوون و شەهید بوون برینی ئەوان هیچ كاتێك لە دڵی ئێمە دەرناچێت.

خودێ مەزن شیفا بۆ بریندارانیش بنێرێت و هیوای سەركەوتن بۆ هەموو لایەك دەخوازم و جارێكی دیكە ئەو سەركەوتنە لە ئێوە پیرۆز بێت، و ئێمە باشیكمان هەڵبژارد لەبەر ئەوە بوو هەموو نەتەوە و ئایین و مەزهەبی تیادا كۆ بۆتەوە و ئێمە هەموومان كورد ، عەرەب، توركمان، كلدان، ئاشووری ، سریان، ئەرمەن، ئایین و مەزهەب ، موسڵمان، مەسیحی، ئێزدی ئەم وڵاتە وڵاتێكی ئازادە و بەری هەر تشتەكی ئێمە لە مرۆڤایەتیدا برای یەكترین و پێویستە نرخی ئەوە بزانین و نرخی خوێنی ئەوان بزانین كە ئەو سەركەوتنەیان بۆ ئێمە هێنایە دی .

پەنا بەخوا هەر سەركەفتی بن ..

والسلام علیكم.





SOURCE:: KRP PAGE HIT:: 1829