سەرۆكی هەرێمی كوردستان لەگەڵ زانایانی ئایینی كۆبۆوە


KRP.org | |


09/08/2017
ڕۆژی چوارشەممە 9ـی 8ـی 2017 لە شاری هەولێر و لە هۆڵی شەهید سەعد عەبدوڵڵا بەڕێز مەسعود بارزانی سەرۆكی هەرێمی كوردستان لەگەڵ ژمارەیەكی زۆری مامۆستا و زانای ئایینی و كەسایەتییە فكری و ئایینییەكانی كوردستان كۆبۆوە.

لە كۆبوونەوەكەدا سەرۆك بارزانی گوتەیەكی پێشكەش كرد و تێیدا ڕۆشنایی خستەسەر ڕیفراندۆم و بڕیاری گەلی كوردستان بۆ پیادەكردنی مافی چارەنووس و رایگه‌یاند، ریفراندۆم ته‌نیا بۆ گه‌لی كورد نییه‌ و بۆ ته‌واوی پێكهاته‌ نه‌ته‌وه‌ییه‌كانی كوردستانه‌.

هەروەها ئەوەیشی خستەڕوو كە عێراق شكستی هێناوه‌ له‌وه‌ی بتوانێت كوردستان وه‌كو هاوبه‌شێكی راسته‌قینه‌ قه‌بووڵ بكات و زیاتر له‌ ٤٥٠٠ گوندی وێران كرد، وێڕای پرۆسه‌ی ته‌عریبكردن، گه‌لی كوردی ئه‌نفال كرد و به‌ چه‌كی كیمیاییش كوردستانی بۆردوومان كرد.

سەرۆك بارزانی له‌ باره‌ی پێشێلكردنی ده‌ستووری عێراقیشه‌وه‌ روونی كرده‌وه‌، له‌ دوای ٢٠٠٣، حكوومه‌تی عێراق، نزیكه‌ی ٥٥ مادده‌ی ده‌ستووری پێشێل كردووه‌، كه‌ زۆرینه‌ی گه‌لی عێراق ده‌نگی پێداوه‌، هاوكات سووننه‌ و كوردیش په‌راوێزخراون. دووپاتیشی كرده‌وه‌، كورد هه‌وڵی زۆریداوه‌ بۆ ئه‌وه‌ی وڵاتێكی فیدراڵی له‌ عێراق بنیات بنرێت و له‌ ٢٠٠٤ رێژه‌ی كورد له‌ سوپای عێراق ٤٠% بوو، به‌ڵام ئێستا ئه‌و رێژه‌یه‌ سفره‌.

سه‌رۆكی هه‌رێمی كوردستان، ئاماژه‌ی به‌وه‌ش كرد، چه‌ند جارێك رایانگه‌یاندووه‌، ئه‌گه‌ر عێراق له‌ پێشێلكردنی ده‌ستوور به‌رده‌وام بێت، ئه‌وا هه‌رێمی كوردستان به‌شێك نابێت له‌ عێراق.

سه‌باره‌ت به‌وانه‌ی كه‌ ده‌ڵێن كاتی ئه‌نجامدانی ریفراندۆمی سه‌ربه‌خۆیی هه‌رێمی كوردستان گونجاو نییه‌، بارزانی رایگه‌یاند، با ئه‌وان پێشنیازی كاتێكی گونجاو بكه‌ن و به‌دیله‌كانییان بخه‌نه‌ڕوو. ڕاشیگه‌یاند، ئه‌گه‌ر ئه‌وانه‌ی داوای دواخستنی ریفراندۆم ده‌كه‌ن هیچ به‌دیل و ئه‌ڵته‌رناتیڤێكی به‌هێزتریان نییه‌، با داوای دواخستنی ریفراندۆم نه‌كه‌ن، چونكه‌ ئێمه‌ دوای ناخه‌ین.

هەر لە درێژەی وتەكانی لەگەڵ مامۆستایانی ئاینی سەرۆكی ھەرێمی كوردستان رایگەیاند: "مامۆستایانی ئاینی لە شۆڕشی ئەیلول رۆڵی سەرەكیان بینی، لە ئاراستەكردن و ھاندان و بەرزكردنەوەی مەعنەویاتی خەڵك، ھەندێك لە مامۆستایان شەھیدیش بوون، داواتان لێ دەكەم ئەو رۆڵەی لە شۆڕشی ئەیلول بینوتانە بۆ سەربەخۆی كوردستانیش ئەو رۆڵە ببینن، ئەگەر تەماشای مێژوو بكەین ھەموو رێبەرەكانمان پیاوی ئاینی بوون، ھەر لە شێخ عەبدوڵڵای نەھری تا دەگاتە شێخ عەبدولسەلامی بارزانی و شێخ ئەحمەدی بارزانی و شێخ مەحموودی حەفید و شێخ سەعیدی پیران و سەید عەلی رەزا و پێشەوا قازی، من ھەمیشە قەناعەتێكی تەواوم ھەیە كە ئاین و نیشتمان لێك جیا ناكرێنەوە و تەواوكەری یەكترن، بەشێكی زۆری ئەو خەباتە دەكەوێتە سەر شانی ئێوەی بەڕێز، دەبێ ئەو خەڵكە تێبگەیەنن و پێبگەیەنن".

سەرۆك بارزانی ئاماژەی بۆ ئەوەشكرد: "ئەوانەی ئێش و ئازاری ژێردەستەیی و ئەنفال و كیمیاباران و دەربەدەریان دیوە، ئەوان نرخی ئازادی دەزانن".

لە بەشێكی دیكەی وتەكانیدا سەرۆكی ھەرێمی كوردستان گوتی: "ریفراندۆم ھی تاكە كەس نییە و ھی ھەموو تاكێكی كوردستان و حزبێكی كوردستانە، ئەوانەی رۆژی ٧ حوزەیران ئەو بڕیارەیاندا، سەروەرییەكی گەورەیان بۆ خۆیان تۆماركرد لە مێژووی كورد و كوردستان".

بۆ بینیی وتاری سەرۆك بارزانی لە كۆبوونەوەی لەگەڵ زانایانی ئایینی لە ڕۆژی چوارشەممە 9ـی8ـی2017 ئێرە دابگرە.




SOURCE:: KRP PAGE HIT:: 514